Archivio tag | tradizione

pasta cu li cavùri

linguine ( bavette) con i granchi al sugo,

pasta cu lli cavùri. piatti antichi del salento jonico

Sto fazzu la paccia ca vo’ circannu do’ cavuri, ma pare ca s’onu persu!!!
Agghju sciutu a Tarantu abbasciu alla duana addo “Cicci u ‘gnure” addo “Cesarino”, alla “Bicicletta” maccè!!!

Agghju ddummanatu puru a ‘Ntonio Nocera ca passa tutti li matine alle 7 e grita cu l’altoparlante ” pesci frisku, vagne’!!!!, ma niente, cavuri no si nn’acchjunu! pare ca li cavuri s’onu persu, sontu animali in via di estinzione e li piscaturi no li ponnu pisca’, ci no pàjunu la multa.

Mi ricordu ca quannu era piccenna passava ‘ntra lu paisu nu cristianu cu li cazuni alla zzuvarra, cu na bicicletta vecchia e nu sicchju chjnu ti cavuri, ca facévunu nu rumore comu li lapi e mi facevunu pigghja’ paura!!!

Quannu mama ni ccattava na francata, po’ era nna traggedia quannu l’era a cucina’.

Quannu li minava intr’alla patella cu li faceva mure’ lu fricimiéntu
ca si sinteva ti n’iri scappa’.

S’era tine’ lu cuperchiu carcatu carcatu sobbr’alla patella ca quiri frusculicchj si ni vule’ scappàvunu pi sfuggi’ a na morte atroce!!!

Mo, ca m’agghju fattu vecchia, quannu pensu a certe cose, la mente mea si ni vè luntanu, alli tiempi di tannu e provu na stretta allu core ca si face piccinnu piccinnu… pero, la pasta cu li cavuri, vagnù, tineva nnu sapore, puru ca n’erma suca’ do zzippri( chele) vacanti..ma ni sapevunu comu sia ca ernu aragoste!