Archivio | ottobre 29, 2018

Lu brotu chinu

OLYMPUS DIGITAL CAMERA

LU BROTU CHINU

 

Quannu unu ti la famiglia cateva malatu, si deperiva e si mazzissceva!

Appena ziccava a guari’ o pi lu fa’ guari’ apprima si tava lu brotu chinu!

A Tàrantu sta minestra si chiama “suscielle”, addo nuje invece si chiamava brotu chinu.

Mo vi spiegu!

Intr’a tutti li case stava “lu uertu” ca era nu spaziu lastricatu, cu n’otru picca ti terra addo si chiantava lu vasinicola e lu putrisinu, li garofani e ‘nqualche otru fioru.

Retu retu stava quasi a tutti li case na gabbia cu doi tre jaddini ca si criscèvunu propia pi lu uevu friscu alli piccinni, alli viecchi e alli malati.

Quannu ‘ntr’allu puddaru stava ‘nqualche jaddina ca era scuvatu, e no faceva chju uevi, allora si puteva ‘ccitere o pi Natale o pi Pasca o ci ‘ncuarched’unu stava malatu!

Si priparava lu brotu di jaddina e si ni mitteva nu picca ‘ntra na patelluzza. Mentre ca sta bulliva si minava intra a stu brotu nu uevu prima sbattutu cu lu furmaggiu e na puzatedda di muddica ti pane spriculata ‘ntra li mani, cu na figghjazza ti putrisinu.

Si faceva còcere na ticina ti minuti, si mitteva ‘ntr’alla pastina cucinata a parte e si tava a mancia’ allu malatu.

Puru ca lu malatu no nni vuleva, bastàvunu toi, tre cucchiari pi fa’ risuscità puru li muerti!

Annunci