Archivio | novembre 23, 2013

Mestra Chicchina e li chiavutiéddj

Mestra Chicchina

Stonu certi storie ca onu successu allu paisu mia ca nisciùnu canosce, ma sontu tanta beddi ca quannu li sentu mi rìzzic’nu li carni.
Questa ete propia bedda.
Quannu scuppiò la prima uerra mondiale tutti li uèmmini giuvini érna scè alla uerra pi salvà e difendere la Patria.
Rimanévunu sulu li viecchj. Appusitìu mancàvunu anni sani sani li falegnami, li scarpari, li cuntadini, li massari, li conzacràste, insomma tutti quiri ca tinevunu nu mistiere.
Intr’a San Giorgi stàvunu tanta falegnami, e tutti èrnu sciutu alla putèa di “Mestru” Carmelu Capozza cu si mparàvunu lu mistiere di falegname d’arte fina.
Quannu Mestru Carmelu e l’otri falignami fùrunu chiamati pi scè sott’a l’armi rimanérnu sulu li femmini e li viecchj.
Mo ti vogghju, ca murévunu li cristiani e no stavunu cchiù chiavuti!!!!
Murévunu li piccinni e no stavunu chiavutieddj. Comu s’era ffa?
Tannu li piccinni murévunu puru cu nna freve, ca no stavunu miticini cu si curàvunu.
Ogni giurnu murévunu piccinni, e sirvèvunu li chiavutieddj, tant’è ca quannu sunava la campanedda era lu nsignale ca era muertu n’otru piccinnu.
Allora la mugghjere ti Mestru Carmelu Capozza, (ca si chiamava Frangesca Carafa, zia ti quiru Giuliu Carafa, maritu ti Ratodda ti lu furnu) chiamò cincu se’ femmene e li mittiu tutti a fatià ‘ntra la putea.
Edda ormai tineva l’esperienza di tant’anni ca era vistu fatià lu maritu e sapeva diriggere bona li ‘iutànti sua e li màschili cchiù viecchj scèvunu a Tarantu cu lu travinu e scè pigghjàvunu lu ligname e lu purtàvunu a San Giorgi.
Di tannu ‘sta cristiana cussì attiva la chiamàrnu tutti “Mestra Chicchina” .
Nu titulu ca li spittava di dirittu!

* nella Foto d’epoca Mestra Chicchina e Mestru Carmelo Capozza che stringono con tenerezza il nipotino Giuseppe.

Annunci