Archivio | gennaio 17, 2013

Li sere ti ‘nviernu ‘nturnu alla fracera

OLYMPUS DIGITAL CAMERA

Li sere ti ‘nviernu totta la famiglia stava intr’a casa.
Li fémmene e li viecchi stavunu ‘nturnu alla fracèra, ogni tanta scarnisciàvunu lu fuecu e lu facévunu bbivéscere, e lu cavutu faceva fa li sazizzi alli jammi.
Pi furtuna ca ogni tanta si mitteva lu ssucapanni sobbra, pi ssucà li pannicieddi ti li piccinni, specie ci lu giurnu era chiuvùtu e li rrobbe nonci ssucàvunu.
Li piccinni cè tinevunu bisuegnu cu si scarfàvunu??
Ca quiri scévunu sempre a ner’a neru e nonci sintévunu mancu ci faceva càvutu o feceva friddu!
Li viecchi cuntàvunu storie ti la uerra, puru ca tutti li sapèvunu a memoria!
Li fémmene, ricamàvunu, o fatiàvunu alla maglia, si cuntàvunu quarche stuticarìa e ‘spettàvunu cu vineva lu suennu. Quannu li uecchi si facévunu papuddi papuddi, nturtigghjàvunu la fatia intr’a nu cuscinu vecchiu e si scè curcàvunu.

E la matina s’azàvunu prestu, ca lu pruverbiu dice: ci vuè futti la vicina, còrchiti prestu e òziti ti matina!

Annunci