Archivio | gennaio 11, 2013

Puccia alla vampa

interno della puccia

Pucce alla vampa

Pucce alla vampa

Quannu màma faceva lu pane faceva puru lu fucazzieddu o doi tre pucce alla vampa.
Lu fucazzieddu era na cosa chju prelibata, chju di lussu.
Stàvunu do tipi ti fucazzieddi, unu sulu cu lu pummitòru a pizzetti e l’otru ca si chiamava fucazzieddu chinu
era ‘mbottito t’ alie, ti sarde salate, ti cipodda, ti pummitori, ti cchiapparini e si ‘nfurnàvunu prima ti li pucce, piccè avevun bisuegnu ti deci minuti di chju ti cuttura.
Li furnare tinévunu tanta abilità ca facévunu lu spaziu ‘ntra lu furnu e scupàvunu totta la cennere e li rimanenze di la stroma askuata, pulizzàvunu pulitu pulitu e mittévunu la spasi ti li fucazzieddi.
Li pucce invece si cucèvunu intra cincu sei minuti. E puru qua tinévunu tanta ti quera abilità ca nui piccinni rimanemmu a vocca aperta pi la meraviglia!
Cazzàvunu li panittuddi distinati alli pucce ‘ntr’alli parmi ti li mani, li vacévunu vula’ comu fàcinu mo li pizzaiueli, e li lanciàvunu ‘ntra lu furnu comu sia ca èrnu dischi volanti.
Sùbbitu la puccia gunfiava comu nu pallone e si rrussava ti sotta e ti sobbra.
Po’ chiamàvunu li cristiani cu nome o cu soprannome e li cunsignava li pucce.
Li pucce askuavunu comu lu fuecu ca l’era cucinatu, appusitìu si ‘nturtigghjàvunu intr’a na tuvàgghia pesante o intr’a na manticedda e si curreva a casa, a pirìculu cu svenivi pi la fame e pi l’ardoru.
Quannu la mamma tagghjava la puccia, asseva ancora lu fumu…li mitteva na croce t’oglio e ti la manciavi cu tanta gustu e cu tant’appititu.