Archivio | novembre 23, 2012

Li cozze chjne


Quannu li cozze tarantine no vonu tanta buene, ca so li misi cu la erre, si àcchjunu alla pescheria certi spaccimi ti cozze ti na quarta l’una, granni quantu na barca!
Sontu li cozze ca vènunu ti la Spagna.
Quannu l’acchjate ‘ccattàtine nu chilu e facitili chjne.
Spilàtili, raskati tuttu quiru ca ste sobbra e aprìtile nu picca cu la crammedda. ‘ppuggiàtile intr’a na coppa e facìtili scula’.
Intra quiru frattiempu apriti to’ ove, e faciti nu ‘mpastu cu l’ove, la muddica ti pane e lu formaggiu: mittiti puru na spica ti agghja e lu putrisinu tagghjatu finu finu.
Cu lu cucchiarinu skaffati nu picca ti ‘mpastu intr’alli cozze e ‘ttaccatìli a un’a una cu lu cuttone.
È indicatu lu cuttone ca serve alli sarte pi’ impastì e pi fa li ‘ndirlanti… ( punti lenti) ma io no ni tineva e agghju misu l’azza rossa.
No faci nienti, nonci si more pi cussì picca!
Fricìti li cozze ‘ntra la frizzola cu picca ogliu, e ‘ppuggiatili ti la vanna ti lu uevu. Facìtili ‘rrussa’ e llivàtili a un’a una.
Priparàti nu picca ti sucu cu l’agghja, e quannu ha cuettu nu quartu t’ora minate li cozze, e faciti fini’ la cuttura!
Cu lu sucu si po’ ‘ccunza’ la pasta o si ‘ssuppa na fedda ti pane!

Annunci