Archivio | settembre 3, 2012

Lu palummieddu

Quannu na fèmmena partureva, li vicini ti casa ca sce’ facèvunu visita li purtàvunu lu palummieddu.
Stava a ci li crisceva propia cu li vinneva.
Prima li piccinni si ‘llattàvunu alla menna fino a quasi to anni. La mamma li primi giurni dopu ca era parturito si manciava sulu lu brotu leggero, cu faceva lu latte.
Era sta attientu cu no si manciava cose ca putèvunu fa male allu piccinnu, ca tannu li còlichi ti li piccinni nonci si capèvunu, si pinsàvunu ca ernu tuvuti a ce cosa s’era manciatu la mamma.
Mo’ li piccinni si crèsciunu cu lu latte artificiale e chiànciunu notte e giurnu ca tènunu li còlichi…
Finalmente quannu ‘rrivàvunu li primi tienti la mamma tineva la scusa bona cu li livava lu latte, specialmente quannu si sinteva tulori ca li piccinni ziccàvunu muezzichi alli capicchi.
Intanto li ziccàvunu a da’ nu picca ti pane masticatu ci li tinèvunu ‘ncueddu quannu sta manciàvunu, nu vuccone ti pasta spriculata, n’assaggiu ti fave, ti patane, ti ‘ndròmmisi. Mo’ sulu a pinsa’ certe cose ni veni lu trièmulu!

Quannu li piccinni ziccàvunu a sinte’ lu sapore ti certe cose, diversi ti lu latte ti la mamma, era ‘rrivatu lu mumentu ti lu pane cuettu!!!

Nota: purtroppo questo post non è dotato di fotografia, in quanto l’usanza del brodo di colombino ormai è definitivamente scomparsa.