Archivio | luglio 13, 2012

li spizzatòri cu li fave spizzutate

No vi critìti ca ete nu scioglilingua! Ca nonc’ete nu scioglilingua!
Ete nu piattu sapuritu ca agghju fatto sti giurni ti lugliu!
Propia “quistu” lugliu, ca ste mena lu fuecu ti Minosse e ti Caronte.
Agghju ccattatu nu paru ti kili di fave cu la scorza, ca mo ete lu tiempu giustu cu si ccattunu.
Mo è tiempu ti ccattà li cìciri, li fasuli, li fasuli pinti, li fave e la tolica. Pisieddi si n’ àcchjunu ti menu
piccè si vénnunu quasi tutti vierdi e frischi.
Mo ti vogghju!
Pi llivà lu nasieddu alli fave ha statu n’avventura!
Mi pareva sia ch’era a essere facile.
Invece pi fa na francatedda di fave spizzutate m’agghju spizzutatu prima l’ogna ti lu tiscitone e po, cu l’aiutu ti Diu, agghiu riuscitu a cucinarne armenu pi fa nu piattu pi la fotografia!

Lu fattu ete, ca m’onu vinutu assai liquidi, e allora pi salva’ totta la fatia ca era fattu, agghiu pinzatu buenu cu cucinu na quarta ti “Spizzatore” e cu li cconzu cu li fave. Matoooooo!
No vi ticu cè sapore ca tenevunu…lu vasinicola po’, ca agghju misu sobbra allu piattu pareva nu fioru all’occhiello!
Ebbè, ci vole sempre nu picca ti poesia, puru pi li fave spizzutate!

Annunci