Archivio | luglio 9, 2012

LU CRATTA CRATTA

Tiempu t’estate, quannu faceva assaje càvutu, ni ‘ssittemmu tutti ‘nnant’a casa a pigghja nu picca ti friscu. Versu li cincu, li sei, passava quiru ca vinneva li cratta-cratta.
Li mamme stàvunu ancora ‘ntr’alli case, ma li piccinni stàvunu già ‘ddà fori a sciuca’ a campana o alli quattru pizzuli o a batti parete.

A nu certu mumentu tutti zimpammu li recchie, sta ‘rrivava quiru ca vinneva lu cratta-cratta e si sinteva pì lu rumore ca faceva lu carrettu a triciclu, ma po’ critava comu nn’ossessu! “Lu cratta- cratta!!! Bellu bellu, no v’affollati!!!”
Li piccinni appena lu vitèvunu lassàvunu lu sciuecu e currèvunu intra a casa …e si mittèvunu a supplica’ li mamme: ” Ma’, vogghju lu cratta-cratta!!!”
Li mamme no sempre lu putèvunu ‘ccattà e li liquidàvunu subbitu subbitu: ”mo’ nonci po’ essere, n’otra vota po’!”
Li chju furtunati ca si lu putèvunu ‘ccattà, si ni trasèvunu intra cu no facèvunu vine’ lu spilu all’otre e po’ eran’a spàrtere cu li cumpagni!
Ah! Quant’era buenu lu cratta-cratta tiempu ti staggione!
Era nu gilatu fattu ti gghjacciu. Lu cristianu ca li vinneva purtava tre o quattru blocchi ti gghiacciu ‘ccucciatu cu nu saccu bagnatu, po’ cu n’attrezzu lu crattava e lu mitteva ‘ntr’allu bicchiere. Lu gghiacciu vineva finu finu comu la neve, po’ li vacava sobbra nu picca ti sciroppu alla menta o all’amarena o all’orzata, ti mitteva nu cucchiarinu intra e ti lu tava….
Otru ca li gilati ti mo’!

Annunci