Archivio | Mag 4, 2012

SCIOTTA TI MARANCIANE

 

Pulizzate tre o quattro patane e tagghjàtile a pizzetti.

Facìtile spricere ‘ntr’all’oglio, cu nu picca ti cipodda.

Vutate e girate ci no s’incòddunu.

Quannu onu ‘rrussatu nu picca, minate li maranciane tagghjate a pizzetti crossi,

facite ‘rrussà puru quisti ‘ntr’all’oglio.

Po’ minate nu picca ti salsa a pizzetti e mittiti lu cuperchju.

Facite cucina’ a fuecu lientu ca la patana voli lu tiempu sua cu si coce.

Versu la fine ti la cuttura minati lu sale e nu picca ti vasinicola

e ci lu tiniti mittiti puru nu picca ti furmaggiu picurinu

ca vi ‘mprofuma totta la cucina e vi ‘rricchesce ogni minestra.

Alli tiempi ti ‘ttànema ‘ntra la sciotta si minava puru nu uevu….

taccussì la minestra era chiù bona!

 

Lu pane, puru ci ete tuestu, si rimmodda ‘ntra lu sucu ti la sciotta.

Annunci